烈女唎酒師
愛「べろべろ Bero Bero」，老闆 Leslie 是當中的主因。距離第一次的認識，數年間她開拓了新事業，一家她夢想中的日本酒酒吧。說話粗豪，喜怒形於色，感覺像是去她家作客，多於受她服務，加上她人如店名，可以跟客人飲酒，飲至自己亦べろべろ，醉得打爛酒杯，還要同事送她上的士回家，香港鮮見如此沒架子地喝酒的老闆，那一刻，我就喜歡上這裡、喜歡上 Leslie。
烈女之練成
烈女跟日本酒，好像不搭配，兩者甚麼時候相交了？「之前香港日本餐未流行，只知日本酒有久保田、上善如水，沒有特別的感覺，就算 2003 年搬到日本住，聽講燒酎卡路里低、醉後都無頭痛，反而開始跟着日本人飲燒酎」，跟日本酒的緣份還未開始，「記得喺老公日本屋企，同佢哋一家人過新年，大家圍住電視，邊睇紅白邊飲酒，飲醉就瞓，瞓醒又繼續飲。日本酒就似一種大時大節會飲的酒。」雖未養成喝日本酒的習慣，卻建立了醉酒豪情。
2006 年，日本餐飲文化於香港開始成形，大家對料理追求越高，連帶日本酒亦終被關注。「掛住日本嘅嘢食，雖然風味有唔同，都忍唔住會去香港嘅日本餐廳，由於少燒酎的選擇，反而令我飲多咗日本酒；加上老公在日本食品公司工作，我亦有機會接觸不同品牌的日本酒，如奈良春鹿的秋季特別版，熟成的香味，好味到不得了。」終於終於踏上了日本酒之道。
迷上癮，2012 年開拉麵店時，亦加入酒館的原素，小食似用作佐酒多於配搭拉麵用，雪櫃放着不同的酒樽，以做生意為名，更多籍口去研究日本酒，但那還未是 Leslie 的心願。
型住飲酒
「我好鍾意日本細細間嘅酒吧，休閒咁飲吓酒、少少佐酒食物，但我又唔需要即刻搞到，一切隨心睇緣份」，緣份來了，遇這心意舖位，一撻即著，Leslie開始張羅裝修設計、找貨源等等，燃燒起的熱情，一發不可收抬，於緊迫的開店準備期間，更飛到日本學習日本酒的知識。
「其實我為興趣多一點，準備開店時無意中看到這個包酒店的兩日一夜唎酒師課程，沒想太多，就立即報名飛去東京了，因為我份人唔等得，啱就去做。」急性子的Leslie，全心全意去讀，學習了日本各區產地的氣候、酒藏等等基本知識，再自己打電話去酒藏相約見學，雖然忙碌，但跟心願又走近了一大步。
 |
|
4種試飲set $158
可以一次過試足四款日本酒，由淡至濃，由甜至酸。
|
「而家香港人、住港日本人都會來Bero Bero，有種被大家肯定的感覺，同時我個人鍾意啲靚嘅酒樽，我想大家覺得日本酒都可以有型，你睇呢枝 Four Fox Sake，個樽身有日本劍、狐狸嘅設計，但又可以着燈，好似俾你係club度飲酒咁，唔會好似以前咁老餅嘅感覺。」
沒有被日本酒的傳統規範，就按自己的個性，大家願者上釣，找 Leslie 喝一杯，或許對日本酒有意外的發現。
隱家清酒吧
第一次去 Bero Bero，就在卑利街行了一圈，但遍尋不獲，唯有打電話問路，再勞煩老闆出來接我們，原來 Bero Bero 藏身於法國餐廳 Fridge 內，過了關才找到，童叟無欺的隠れ家。
趟門打開，走入和洋風的格居，落地式的玻璃酒庫，可以清楚看到店子有甚麼酒藏，大部份都是擁有唎酒師牌的老闆娘 Leslie 親自入貨，有近百款日本酒選擇，她更細心地選軟水作樽裝水，為求不讓丁點礦物質影響日本酒的味道。店子特別擅長應對選擇困難症的客人或日本酒初心者，其比拼套餐，一次過可以試到四款時日推介日本酒，慢慢試過不同風格的，再選自己喜歡的日本酒味。
料理餐廳方面，就有十多款佐酒小吃，有 Leslie 親手做，亦有由日本訂貨返來，但個人推介在日本垂手可得的關東煮，香港沒有幾多家料理店做這平民美食，Leslie 落足心機煮，熱騰騰的香味，配一壺熱燗就最好不過。
若然想玩味，亦可以柯打 Fridge 的西餐，不設附加價，可以點生蠔、燒春雞等等，再試配日本酒，法日 crossover，夠趣味。
關東煮 $166 黑牛純米吟釀 $480
一碟六件的關東煮，濃淡剛好，配黑牛熱燗最佳，這純米吟釀取用雄町米，甜酸度剛好。
廣戶川純米吟釀 $620
一打開即香氣四溢，無過濾生原酒，味道意外地不辛辣，甜度輕輕的。
時日推介佐酒小食拼盤 $106
一碟已有小葫蘆漬物、鰹魚酒盜忌廉芝士、明太子薯仔沙律、
山葵八爪魚，方便配搭不同口味的日本酒，如做實驗一樣。
張凱莹
Leslie Cheung
べろべろ Bero Bero Sake Bar 老闆
SSI 唎酒師
Bero Bero Sake Bar
中環卑利街48號地下
2169 3708
No comments
Post a Comment